ازاي تجهزي غرفة المعيشة

غرفة الانتريه أو المعيشة .. من الغرف المهمة جدا في البيت ، لان معظم الوقت بيبقي فيها للفرجة علي التليفزيون أو للدردشة مع اهل البيت .. علشان كده من المهم جدا انها تبقي مريحة وعملية وفي نفس الوقت جميلة .. مش علشان حنعملها مرحية وعملية يبقي شكلها وحش ونشاز عن بقيت البيت

حاولي دايما تختاري الوان زي البيج ودرجاته المختلفة .. وممكن تستخدمي ورق حائط برده يكون داخل فيه ألوان بيج .. وممكن تستخدمي مكس بين الاثنين بمعني حائط واحد معمول بورق الحائط والباقي معمول دهان

لاحظي ان الوان الحوائط كل ما تبقي هادئة حتبقي مريحة للعين وبرده مش حتزهقي منها بسرعة وخاصة ان صعب تغييرها كل شوية .. بعكس الاكسسوارات الموجودة في الغرفة تقدري تغيريها كل شوية وتجددي فيها

بالنسبة للارضيات لو حتعملي باركيه .. يفضل الباركيه العريض ، لو حتستخدمي رخام .. يبقي الرخام المعتق حيكون اختيار رائع ، طبعا لو فكرتي في البورسلين حيبقي حل كويس لان فيه الوان واشكال كثير وتقدري تعملي بيه ماتشنج مع حاجات كثير في الغرفة وبالذات لو كانت الغرفة دي مفتوحه علي بقيت غرف البيت مش معمولها باب وينفع تتفصل

حاولي تستغلي المساحة باثاث متنوع ومتناسب مع الديكور العام للبيت ، وطريقة توزيع الاثاث متوقفة علي موقع التليفزيون وبناء عليه حتقدري توزعي الكنب والكراسي والترابيزات والاكسسوارات المختلفة اللي حتستخدميها في الغرفة

فكري  تستخدمي كنبة حرف L  لانها عمليه وبالذات لو المساحة المخصصة للغرفة واسعة

حاولي دائما قدر المستطاع ان ترابيزات القهوة تبقي زجاجية من طبقتين لانها شفافة وعملية  وحتظهرلك أي اكسسوارات أو كتب ومجلات انتي مستخدماها

لو انتي عاملة ستايل الغرفة مودرن ، تقدري تستخدمي بعض القطع الاثرية او الشرق اسيوية زي الكونسول وترابيزة القهوة ، مع ملاحظة ان لازم يكو نفي تجانس بين القطع ومكملة لبعضيها

التليفزيونات الحديثة دلوقتي بتتثبت علي الحائط وبالتالي تقدري تخلي الحائط اللي حتثبتي فيه التلفزيون تعملي فيه مكتبه ظريفة صغيرة تحتيه تبقي الاسلاك مستخبية فيها ويبقي جنبيها او تحتيها أرفف متنوعة سهل استخدامها في الاكسسوارات والكتب المختلفة

متنسيش الاضاءه ، وبالذات الاضائة الجانبية زي اللامباديرات ، وعلي جانبي الكنبة ، وبرده الانارة المخفية في الاسقف او المكتبة ، وبلاش السبوت لايت بكثرة لانه مش حيديكي احساس الدفئ المطلوب في المكان

كل ما تكون الغرفة مريحة وفيها بهجة حتبقي ممتعة لكل اهل البيت لان دي المكان الرئيسي للفرجة علي التليفزيون واجتماع كل افراد العائلة والاصدقاء المقربون مع بعض