ازاي تختاري لون غرفة

فكرتي انك تغيري لون الحوائط الخاصة باحدي غرف البيت ..ومحتاره مش عارف تختاري اللون ازاي ؟؟

في اسئلة رئيسية مهمة لازم تفكري فيها وانتي بتختاري لون الغرفة .. لانها حتحدد اهمية الغرفة دي ليكي ونظرتك لاستغلالها ..علشان لا تتفاجئي بعد الدهان ان الغرفة مملة أو غير مناسبة للاستخدامات التي قررت تخصيصها لها

·        اولا .. ايه لونك المفضل .. ايه الألوان اللي بتحبيها .. لو محتاره جربي تفتحي علبة طباشير ملونة .. واختاري منها الألوان اللي بتحسي ان عينك مرتاحه ليها

·        ثانيا .. ايه رد فعلك للألوان اللي اختارتيها .. هل بتأثر فيكي الألوان اللي بتعطي ظلال كأنك وقت الغروب .. هل بتاثر فيكي الألوان الصافية الواضحة

·        ثالثا .. ايه طبيعة الوان الملابس في دولابك واختيارك لها .. هل بيحتوي علي الوان متعددة ولا معظمة لون واحد أو لونين ..

·        رابعا .. هل عايزه تشعري بحجم فراغ أكبر في الغرفة .. يعطيكي شعور بالراحة .. أم تودي ألوان تعطيك احساس بفراغ أقل يعطيكي المزيد من الشعور بالدفئ وأنتي في الغرفة

·        خامسا .. لو بتفكر تدهن أكثر من غرفة .. هل ناوية توحدي اللون ما بينهم ولا عايزة كل غرفة بلون مختلف

·        سادسا .. ايه طبيعة الشعور اللي عايزة تحسيه وانتي قاعدة في الغرفة .. مسترخية .. متحمسة .. نشيطة ؟؟

·        سابعا .. ايه هي استخدامات الغرفة حاليا .. وهل الالوان اللي فيها انتي متعايشة مع درجاتها ومدياكي الاحساس اللي انتي عايزاه وبس عايزة تجددي اللون .. ولا حاسة انك محتاجة تعملي تغيير كلي تماما

·        ثامنا .. ايه كمية الضوء المتاحة في الغرفة وامتي بيبقي فيها أكبر كمية ضوء .. وهل ده بيبقي في الفترة اللي انتي بتستخدمي فيها الغرفة دي ولا لأه

·        تاسعا .. هل بتسعي لاختيار لون يعمل علي استدعاء ذكريات معينة في ذاكرتك .. ولا مجرد بتختاري لون يتناسب مع ما موجود في الغرفة

·        عاشرا واخيرا .. هل الغرض من تغيير لون الغرفة هو دمج كل محتويات الغرفة في لوحة واحدة متناسقة مع بعضها فقط .. أم ان الغرض هو علاقة تلك الغرفة بغرف أخري موجودة في البيت ؟؟

الاسئلة لو بصيتي ليها أول مرة حتحسي ممكن انها صعبة .. او ممكن تحسي انها مالهاش لازمة .. لكن لو فكرتي فيها كويس .. حتلاقي انها فعلا مهمة لان اجابتك عليها حتعكس شخصيتك اللي بتدوري علي اظهارها في الغرفة